2Cor 3 | KYG | STEP | Lagaemo mani gee'mo hutae'mo halate alagepa ali'ya'mo ne'aluna vaya'mo mai'none, huta lagaiti lagitile'mo alita asaga huta nelatopiye. Mago vaya'mogimo mono ali'ya alisayafe'mo alagepa mono ali'ya ne'aliya vaya'mo mai'nae, hu'a avo'mo kae'a apami'nage'a alini'a ne'vae. Ani agufa avo'mo'a laha maesiya avo'mo kaeta lapamisupi lapakaepati'mo alinituta alu vaya'aina apamigupiye. Ha'ao.

2 Corinthians 3

Saufa kotalake gelefe'mo ali'ya'mo ne'aliya vaya'aife'mo apava gemo hu'niya gemae

1 Lagaemo mani gee'mo hutae'mo halate alagepa ali'ya'mo ne'aluna vaya'mo mai'none, huta lagaiti lagitile'mo alita asaga huta nelatopiye. Mago vaya'mogimo mono ali'ya alisayafe'mo alagepa mono ali'ya ne'aliya vaya'mo mai'nae, hu'a avo'mo kae'a apami'nage'a alini'a ne'vae. Ani agufa avo'mo'a laha maesiya avo'mo kaeta lapamisupi lapakaepati'mo alinituta alu vaya'aina apamigupiye. Ha'ao. 2 Lapakaemo avo'mo nekaya yakana hutapa mai'nae. Kalaisi'a ani avo'mo laipafi'mo kae male'nige'apa muki'amogimo lapakete'apae'mo ani kava hu'a avo'mo agete'a lekana nepaiye. 3 Kalaisi'a ali'yatileti'mo afole yate'mo avo'mo kae male'niye. Agaemo avo'mo nekaya aniteti'mo avo'mo okae'nifa afa'a ne'maiya Goti Auneme'aleti'mo avo'mo kae male'niye. Latapa yafate'mo avo'mo okae'nifa malu male nehiya lapaipafi'mo avo'mo kae male'niye.

4 Lagaemo Kalaisiteti'mo alino lokiya vaino late'nigetae'mo, Goti aulagale'mo ani alagepa ali'ya'mo ali'none, huta lagesa afita fatago nehune. 5 Himamutimo ohane'niyanageta lagaitimo alagepa lagesamo afa'a o'afigune. Goti ali'ya'amo alisuna himamutimo Gotitegati'mo afole ne'aiye. 6 Agaemo ali'ya'amo alisunafe'mo alino lokiya vaino late'nigeta saufa kotalake gelefe'mo ali'ya'amo ne'aluna vaya'mo mai'none. Saufa kotalake gemo malaga yate'mo avo'mo kae male'niya ke'aepa gegana huno ohane'nifa Auneme'a'e gemo yu'ilaga gemo hane'niye. Ke'aepa gemo'a vaya'mo apamagige'a nefaliya'monanafa Auneme'amo'mo afa'a maisaya ya'mo alino ne'apamiye.

7 Vaya'mo ne'apamagiya gemo yafate'mo avo kae male'niya gemo ali'ya'amo'mo ha le konali ya'amo hane'niye. Mosese'a ke'aepa gemo ali'niya afina'mo augosafati'mo aeno ha le'nige'apae'mo Isaleli vaya'mogimo alagi aulu hae'a o'age'naya'monanafa augosafati'mo aeno ha le'niya ya'amo aise aise huno hano hume hume e'niya ha le konali ya'amo hane'niye. 8 Ani ali'ya'mo ha le konali ya'amo hane'niya'monanafa Auneme'amo'mo ne'aliya ali'ya'mo ha le konali ya'amo'a mago'e huno lusi kava huno aeno ne'agase. 9 Ke'aepa gemo'a huno'ae'mo, hosu vaya'mo mai'nae, huno nehiya gelefe'mo ali'ya'mo ne'aliya ha le konali ya'amo hane'niya'monanafa fatago kava'mo alino ne'apamiya gelefe'mo ali'ya'mo ne'aliya ha le konali ya'amo'a mago'e huno lusi kava huno aeno agase'niye. 10 Akeya'vilaga ali'ya'mo'a ha le konali ya'amo hemenimo ohane'niye. Mago'e huno aeno agase'niya ha le konali ya'mo'a ago aeno ati kae'niya'mofe'mae. 11 Hano hugefe nehiya ali'ya'mo ha le konali ya'amo hane'niyana hano osuno hanege hanege huno hanesiya ali'ya'mo ha le konali ya'amo'a mago'e huno lusi kava huno aeno ne'agase. 12 Lagaemo saufa kotalake ge'aleti'mo alagepa kava'mo afole aigiye, huta huteta lavayagunagu nehuta agava ne'mauna'mofe'mo mago gemo alita fala okita muki ge'amo aeta hakalo huta hapa nepaune. 13 Mosese augosafati'mo aeno ha le'niya ya'amo hano hume hume e'nigeno'ae'mo Isaleli vaya'mogimo augosafi'mo aulu hae'a o'agesayafe'mo lavolavoleti'mo aino ati kae'niya'monanafa lagaemo mago gemo aeta ati nokaone. 14 Goti'a apaipa apakesamo alino akani male'nige'apae'mo ani kava hu'a maime maime e'a hemenimo atafa kotalake gemo lekana nepaigeno'ae'mo ani agufa lavolavomo'a apaipa apakesale'mo aino ati kae'niye. Goti'a ani agufa lavolavomo fiku alino lageno o'atalegaifa Kalaisitetike'mo alino lageno atalegaiye. 15 Lavolavomo'a apaipa apakesale'mo aino ati kaeno haneme haneme ne'egeno'ae'mo ani afina'mo Mosese gemo ali'a lekana nepaigeno'ae'mo ani lavolavomo afa'a hane'niye. 16 Hane'niya'monanafa mago vaya'mo ai'a afe le'a Ala kava netegamo ne'ageno'ae'mo ani lavolavomo alino lageno ne'atale. 17 Ala kava ne'mo Auneme'amo mai'niya'mofe'mo apaipafi'mo ali'ya ne'aliya vaya'mogimo kalavusifi'mo o'mai'a afa'a ne'maiye. 18 Goti'a laugosafati'mo lavolavomo ago alino lageno atale'nigeta alave'yofati'mo laugosamo ne'agona kava huta Ala kava ne'mo ha le konali ya'amo ne'agonageno'ae'mo Ala kava ne'mo Auneme'amo'mo alino hamaleno nelategetae'mo ha le konali ya'amo alime alime uta Ala kava nekana huta hamaleme hamaleme ne'une.